تباكيتن يامليوعات
عدد سنوات
النكبه العشره سكابات
تباكيتن سلتن بدموع
إبكا مشروع
إبكا صادق ماهوش بُروع
ابندابات علي وطن اليوم صار شتات
اليوم فيه الطايح مرفوع
إخلي جالات اللي كاين للطرقي إمبات
تبكاكيتن من خلو الدار وقهر وعار
وطن تقسّم من برنار
وظلم أوقات وسجن تريس وسبي بنات
ووطن إنهار وشعب سُبات
وحي وفي حسبت لموات
تباكيتن ماجاب بكاكن غير عماكن
في غيبت جياب دواكن
سكابات دموع وما قضين حاجات
مطاول صايف مرجاكن
في عازات قعدّت لا وطن ولا بات
بعدهم خان الوقت جفاكن
مكسورات الخاطر والظهر عليلات
تشّاكن تبكن من داكن
غرّادات علي الوطن وفقد الهامات
تباكيتن لعاشر عام
وهو دومام الدمع ومليانات إجمام
علي مافات وماصاير من ترويعات
قعدت بين أعداء وظلام
وملذوعات إلذعتن من قلبت لوقات
إشالن من هول التلذيع ومن الترويع
ومن التجويع ومالتقطيع
ومالتوزيع ومالتركيع
ومن بيعات الوطن ومن ضيع الهيبات
أمه انطاعت للتطبيع وتوقيعات
امعا بن صهيون اجهارات
انباعت بيد ضناها بيع
بعد غيبات اللي كاين للدين حُمات
إنهالن خلكن سكابات
وقولن مات
العز وجي عصر النكبات
