كله تآيه
مش قادر أخبي همومي ياناس
ولا قادر اداري دموعك ياعين
والفرحه ماتت جوايا من سنين
شايف ناس معندهاش إحساس
وكلمة الحق بينهم بتنداس
صعبان عليا الحلم والحق يضيع قدام عيني
بعد ماعمري ضاع علي ولادي
وراح حلمهم فيكي يابلادي
وحدتي في دنيتي تعباني
ولوعتي ع اللي راح معذباني
حيران والحيره محيراني
ونارها جوايا حرقاني
من اللي أنا شايفه ليل ونهار
عقلي حاسس بيه مني طار
وحاجات كتيره مخلياني محتار
كدب ونفاق وضمير مات
وفساد إنتشر جوه البشر
والبركه راحت ومن سُكات
والكل أناني وعنده حب ذات
الفكر تاه ومش عارف أختار
أطبل وانافق وأمشي الحال
وأسكت علي ناس ماشيه شمال
وآخد نصيبي من الكوسه
ولاَّ أفضل وحدي ضد التيار
وافضل عايش وحدي في حوسه
تعبت ياقلبي يامليان محبه
ونفسي ألاقيها هنا وهناك
وف قلوب الناس في كل حته
وازاي نلاقيها في قلوب سوده
والخير جواهم راح ومن غير عوده
كله تآيه..وكله الدنيا ياعيني سرقاه
ومحدش داري وهيا وخداه
والقلوب انطفي فيها المحبه
والشمس نورها غاب حبه حبه
والشهامه ماتت من حوالينا
والأخلاق ضاعت قدام عنينا
لما الحق من الباطل خاف
والعدل غاب لما بعنيه للظلم شاف
وإنداست المبادئ جوه الناس
علشان دنيا ماليها أساس
النفوس طماعه والفكر فكر شيطان
والطمع خلاهم عايشين علينا حيتان
والدنيا شغلآهم ليل ونهار
لارضا ولاقناعه وعايزين منها باستمرار
نعاتب مين ونلوم مين
والغلط راكبنا شمال ويمين
والمرار شاربينه الناس الطيبين
والله قلبي وجعني عليكم ياولادي
وزعلان ده كله يحصل جوه بلادي
شايف الكوسه في كل مكان
واللي خدوا الشهادات راحوا في خبر كان
وياعيني عليهم عايشين مساكين
نفسهم يشتغلوا ومش لاقيين
وهناك عواجيز لسه لازقين
بعد كتير سنين من الستين
مناشير في شركات كتيره ومش سايبين
وكام شغلانه فيها ماسكين
بياخدوا منها فلوس ملايين
وولادنا شباب في البيت قاعدين
والله ياقلبي إحنا مساكين
وشايف بعيني كتير ترزيه
لتفصيل قرارت مؤذيه
وولاد الأصول أبداً مااتغيروش
وللحرام يجوعوا ومايقبلوش
واخلاقهم لسه هيا هيه
وشايف ناس مليانه أمانه
بس ياعيني عايشه غلابه
وقرود بتتنطط ليل ونهار
طالعين نازلين واكلين زي المنشار
خلوا الدنيا صبحت غابه
وعايشين فيها وحوش وديابه
وشايف مطبلاتي علي كرسي مش بتاعه
وشايف نضيف شريف مش في مكانه
شاطر في شغله بس مش حريف
مش واخد حقه وف مكانه ضعيف
حتي الكوسه والفلفل والبتنجان
كانوا زمان أكلت الغلبان
خلوا العقل وصله جنان
نفسي الظلم مايبقاله مكان
والخير جوانا يبقي زي زمان
وكل واحد ياخد بس حقه
والشهامه تبقي في كل واحد طبعه
ده رب العباد ياناس موجود
وعنده خير كتير ومالوا حدود
خواطر(أشرف الدغيدي)
حقوق النشر محفوظة
