اعتراف
نعترف لك
في غيبتك يقسى الشوق يجور
وفي غيبتك ليلي نحسه دهور
ونقعد ندور وحرفي معايا يدور
بس نعترف لك
الحرف يبتسم مسرور
من وهج قلبي الحرف ليه بخور
ومن دمعتي حرفي اروي ممطور
ومن غيبتك
تبدا المعاني للحروف بحور
انتي وبس
في غيبتك معنى الحضور
نعترف لك
عندي الصبح ظلام
والعقل حاير
والشوق جاير
والصبر طاير
والدقيقة ايام
وانشوف لـ حرفي وانا محتار
عنده الليل نهار
ويقول لي احتار
زيد احتار
وخليك حاير تسحنك الافكار
بس يارفيقي نقول لك
انت وبلا إنكار
عايش على انتظار
اللي جاي في عمرك ازهار
تراجي ف بكرة وتغزل الأحلام
وتحوس في عقلي تجول افكار
ويقول لي حرفي لذيذ اغناي
ايش فايدة الايام مافيها انتظار
زهو الربيع وصبح بكرة الجاي
ويرد يقول .. كما المرسول
اسرح مع الذكرى
وراجي بكرة
وعمرك بلا مرجى نزيف ارقام
في غيبتك
حرفي أنا مسحور
انتي وبس
في غيبتك كل الحضور
نعترف لك ..
غاليت قبلك شوق درت غوالي
ومن يوم شفتك تم لي ..
انت النفس وانتي الغلا والغالي
ومهما نقول جديد ..
درت جديد
راهو جديدي انتي
الحرف يرسم فيك ديما يعيد
وانتي حروفي كلها لونتي
يقرا فيك ف طيف الذكرى
حتى في العمر اللي فات
أمس ويومه وحتى بكرة
حضورك..
في كل الاوقات
يصور في الربيع
والعمر البديع
ويقول بكرة جاي
وكل الصور هي منك
وكل الحكايا عنك
في بسمتي وبكاي
انتي قريبي وبعيدي
ونبضي ووريدي
وحبي وريدي
وانتي جديدي
و.. نعترف لك